VLF4eu proiektua nazioarteko YML topaketan
2025eko azaroaren 14an, IMHko ordezkariek, Unai Muniainek eta Irati Salcedok, hizlari modura parte hartu dute Young Manufacturing Leaders (YML) sarearen urteko nazioarteko ekitaldian, Milanen. Bi mahai-ingurutan hartu dute parte: Iratik, “Young Manufacturing Leaders City-Hubs Network: Origin, Journey, and Achievements” gaian, eta Unaik, “Panel II: Young Manufacturing Leaders City-Hubs Flagship Projects” izenekoan.
Lehen hitzaldian, Iratik, YML Basque City Hub-eko kide eta Prozesu eta Produktu Berrikuntzako Ingeniaritza Dualeko ikaslea izanik, ikasleen ikuspegia ekarri du mahaira. YML ekimenetik zer espero duen azaldu du, eta horrelako industria-ekimen internazionaletan ikasleen ahotsa entzutea zein garrantzitsua den nabarmendu du.
Bigarren hitzaldian, Unaik, IMHko Ingeniaritza Dualaren Eskolako irakasle eta ikerlaria izanik, VLF4EU proiektua aurkeztu du, eta Virtual Learning Factory kontzeptuaren potentziala azaldu du: fabrikazio-inguruneak hezkuntza-eremura eramateko eredua, lanbide heziketan, unibertsitateetan eta bizialdi osoko ikaskuntzan. Learning factory horiek birtualizatzeak irisgarritasuna hobetzea dakar, makinak fisikoki eduki gabe ere trebatzeko aukera ematen duelako, edo, edukita ere, erabiltzaile gehiagok batera erabili ahal izateko.
World Manufacturing Forum-ean behin eta berriz aipatu den gai nagusi bat ere jorratu da: ikasleek beren ikaskuntza-prozesuan eskuratu behar dituzten gaitasunak identifikatzea. VLF4EU proiektuan, hainbat herrialdetako skill gap-en analisia egingo dugu, eta horiek betetzeko ikaskuntza-ingurune birtual espezifikoak garatuko ditugu.
Unaik azpimarratu du proiektu honen onuradun nagusiak ikaskuntza-zentroak eta industria direla. Hezkuntza-erakundeek learning factory birtual horiek irakaskuntzan txertatuko dituzte, eta enpresek, berriz, euren langileak birgaitzeko eta gaitasun berriak eskuratzeko erabili ahal izango dituzte, horrela industria-esparruko gaitasun hutsuneak estaliz.
VLF4eu proiektuaren arrakasta elkarlanaren araberakoa da: Europako hainbat herrialdetako ikaskuntza-zentroek, ETEek eta industria-elkarteek egiten dute lan elkarrekin, Industry 5.0-aren ikaskuntza eredu berria eraikitzeko.
Harro gaude eraldaketa honetan parte hartzeaz!
Eskerrik asko World Manufacturing Foundation eta YML Network-i, urteroko ekitaldi estrategiko honetan parte hartzeko gonbidapenagatik, eta YML komunitatera berriz batzeko eta gure proiektu garrantzitsuenetako bat aurkezteko aukera emateagatik.
