Energia fotovoltaikoari buruzko ikastaroa hasi da: ETORKIZUNA ARGITUZ
2025/05/21 14:37:04 GMT+2
"La Caixa" Fundazioarekin lankidetzan, ekimenak prestakuntza teknikoa eta laguntza pertsonalizatua eskaintzen die egoera ahulean dauden pertsonei, energia berriztagarrien sektorean sar daitezen errazteko.
Zaurgarritasun-egoeran dauden pertsonen enplegagarritasuna hobetzeko helburuarekin, "Energia fotovoltaikoko ekipoak instalatzeko, konpontzeko eta mantentzeko teknikaria" ikastaroa hasi da IMH Campusean, "Etorkizuna Argituz" proiektuaren esparruan, "La Caixa" Fundazioaren laguntzarekin.
10 astez, parte-hartzaileek oinarrizko prestakuntza teknikoa eta prestakuntza espezializatua jasoko dute, Tormesh SLko profesionalen eta IMH Campuseko irakasle-taldearen eskutik. Prestakuntza hori zeharkako gaitasunen modulu batekin osatzen da, laneratzeko funtsezko trebetasunen garapenean oinarritua.
Lehen etapa hori amaitutakoan, ikasleak lau asteko fase praktiko batean sartuko dira energia fotovoltaikoaren sektoreko enpresetan, eta eskuratutako ezagutzak benetako ingurune profesionaletan aplikatu ahal izango dituzte.
Gainera, proiektu osoan zehar — urrian amaituko da —, parte-hartzaileek banakako laguntza izango dute Daiteke erakundearen eskutik, eta horrek saioak dinamizatuko ditu erantzukizuna, ekimena eta autonomia pertsonala bezalako alderdiak lantzeko, haien lan-aukerak hobetzeko funtsezko elementuak baitira.
Etorkizuna Argituz proiektua indartsu abiatu da, eta gizarteratzeari eta laneratzeari buruzko emaitzek hasierako aurreikuspenak gainditzea espero da.
